ស្នាដៃបិតាស្ថាបនាជាតិ លី ខ្វាន់យូ ដែលប្រជាជនចងចាំមិនភ្លេច
មនុស្សទៅបាត់ តែស្នាដៃ កេរ្តិ៍ឈ្មោះ និងសមិទ្ធផលនានាមិនរលត់ទៅតាមមនុស្សឡើយ។ លោក លី ខ្វាន់យូ ដែលប្រជាជនសិង្ហបុរីចាត់ទុកថាជាបិតាស្ថាបនាជាតិ បានលាចាកលោកកាលពីយប់មិញហើយ ប៉ុន្តែអ្វីៗដែលអតីតនាយករដ្ឋមន្ត្រីរូបនេះសម្រេចបាន នៅតែមានវត្តមានរហូតដល់សព្វថ្ងៃ។
ខាងក្រោមនេះ ជាស្នាដៃមួយចំនួនដែលលោក លី ខ្វាន់យូ នាំមកជូនប្រទេសសិង្ហបុរី៖
ឯករាជ្យសិង្ហបុរី
ដំបូងឡើយ ប្រទេសសិង្ហបុរីគ្រាន់តែជាកំពង់ផែដ៏តូចមួយ និងជាមូលដ្ឋានទ័ពជើងទឹក ស្ថិតក្រោមអាណានិគមអង់គ្លេស។ ដើម្បីរកវិធីដកខ្លួនពីអាណានិគមនេះ បិតាស្ថាបនាជាតិ លី ខ្វាន់យូ បានរៀបចំយុទ្ធនាការរួមច្របាច់បញ្ចូលគ្នាជាមួយប្រទេសម៉ាឡេស៊ី បន្ទាប់ពីមានការស្នើសុំពីនាយករដ្ឋមន្ត្រីម៉ាឡេស៊ី។
លោក លី ខ្វាន់យូ បានរៀបចំប្រជាមតិនៅក្នុងខែកញ្ញា ឆ្នាំ១៩៦២ ស្វែងរកអ្នកគាំទ្រ ដោយមានអ្នកយល់ព្រមរហូតដល់ទៅ ៧០ភាគរយ។ នៅថ្ងៃទី១៩ ខែកញ្ញា ឆ្នាំ១៩៦៣ លោក លី ខ្វាន់យូ បានសម្រេចចិត្តរួមច្របាច់ប្រទេសសិង្ហបុរីជាមួយប្រទេសម៉ាឡេស៊ី រួមទាំងរដ្ឋពីរផ្សេងទៀត បង្កើតបានជាសហព័ន្ធមួយ។ ទីបំផុត ប្រទេសសិង្ហបុរី ក៏រួចផុតពីអាណានិគមអង់គ្លេសក្នុងឆ្នាំ១៩៦៥។
ការបំបែកចេញពីម៉ាឡេស៊ី
បើទោះបីទទួលបានឯករាជ្យពីចក្រភពអង់គ្លេសក្ដី ក៏ប្រជាជនមិនទាន់ទទួលបានសេចក្ដីសុខពេញទីនៅឡើយ ដោយសារការរួមរស់ក្នុងនាមជាសហព័ន្ធជាមួយប្រទេសម៉ាឡេស៊ី និងរដ្ឋពីរផ្សេងទៀត មានការរកាំរកូសគ្នាជាប់ជានិច្ច រហូតដល់មានការប៉ះទង្គិចបង្ហូរឈាមគ្នាផង។
កុបកម្មពីអ្នកប្រឆាំងកើតឡើងជាបន្តបន្ទាប់ ទំនិញចេះតែឡើងថ្លៃ និងបញ្ហានានា បានដាក់សម្ពាធឲ្យលោក លី ខ្វាន់យូ លើកដៃចុះហត្ថលេខាផ្ដាច់ខ្លួនចេញពីសហព័ន្ធម៉ាឡេស៊ីវិញ នៅថ្ងៃទី៧ ខែសីហា ឆ្នាំ១៩៦៥។ បរាជ័យមួយនេះ បានធ្វើឲ្យលោក លី ខ្វាន់យូ មានការខកចិត្តយ៉ាងខ្លាំង ព្រោះតាំងពីដើមរៀងមក វីរបុរសរូបនេះ តែងយល់ឃើញថាការចូលរួមក្នុងសហព័ន្ធម៉ាឡេស៊ីគឺជារឿងល្អមួយសម្រាប់ប្រជាជនសិង្ហបុរី។
ចាប់ផ្ដើមកសាងប្រទេសពីបាតដៃទទេ
បើទោះបីប្រទេសសិង្ហបុរីធ្លាប់ជាកំពង់ផែ មានផ្ទៃដីតូច ទើបរួចពីអាណានិគម ខ្វះធនធានធម្មជាតិ និងទើបផ្ដាច់ខ្លួនរស់នៅដោយឯកឯងក្ដី ក៏លោក លី ខ្វាន់យូ បានដឹកនាំប្រទេសនេះប្រកបដោយការជឿទុកចិត្ត។ អ្វីដែលប្រជាជនចងចាំមិនភ្លេច គឺអតីតនាយករដ្ឋមន្ត្រីទីមួយរបស់សិង្ហបុរីរូបនេះ តែងក្រើនរំលឹកខ្លួនប្រជាជនជារឿយៗថា ធនធានមនុស្ស និងភាពរឹងមាំក្នុងការងារ ជាកត្តាសំខាន់បំផុតក្នុងការអភិវឌ្ឍន៍ប្រទេសជាតិ។
លោក លី ខ្វាន់យូ បានដឹកនាំប្រទេសសិង្ហបុរីចូលជាសមាជិកអង្គការសហប្រជាជាតិនៅថ្ងៃទី២១ ខែកញ្ញា ឆ្នាំ១៩៦៥ ព្រមទាំងចូលរួមជាមួយប្រទេស៤ ទៀតក្នុងការបង្កើតសមាគមប្រជាជាតិអាស៊ីអាគ្នេយ៍នៅថ្ងៃទី៨ ខែសីហា ឆ្នាំ១៩៦៧។ ចាប់តាំងពីពេលនោះមក ប្រទេសសិង្ហបុរីបានអភិវឌ្ឍខ្លួនរហូតក្លាយជាប្រទេសសេដ្ឋកិច្ចឈានមុខគេក្នុងតំបន់អាស៊ាន និងជាកូននាគមួយនៅអាស៊ី។ ទោះយ៉ាងណាក្ដី លោក លី ខ្វាន់យូ មិនបានក្រាញននាលជាមួយអំណាចទេ ពោលគឺក្នុងឆ្នាំ១៩៩០ វីរបុរសរូបនេះ បានចុះចេញពីតំណែង និងទុកតួនាទីជានាយករដ្ឋមន្ត្រីឲ្យលោក Goh Chok Tong ដឹកនាំបន្ត។
នៅឆ្នាំ២០០៤ ត្រកូល លី បានឡើងមកកាន់តំណែងម្ដងទៀត ប៉ុន្តែរូបគេគឺជាជំនាន់ក្រោយ ឈ្មោះ លី ស៊ានឡុង ត្រូវជាកូនបិតាស្ថាបនាជាតិ លី ខ្វាន់យូ ដែលកំពុងមានវត្តមានដឹកនាំប្រទេសរហូតដល់សព្វថ្ងៃ៕
No comments:
Post a Comment